للي يبي يعرف اسراري وعنواني

ياللي تبي تعرف اسراري وعنوانـي
الحزن والضيق واللوعـه عناوينـي
وان كان من جد يا بن الناس تبغانـي
في كل لمـة حـزن يمكـن تلاقينـي
يكتبني الضيـق واللوعـات تقرانـي
والناي من شرهـة احزانـي يغنينـي
أجامـل الصبـر والايـام تعصانـي
بالله قلي وش اللـي معجبـك فينـي
فقير يوم ان عز النفـس مـا غنانـي
لو قلت للفقر عـز النفـس مغنينـي
كم واحدا ما شتمته لجل مـا عطانـي
وكم واحدا ما مدحته لجـل يعطينـي
يقلقنـي الذنـب لامـنـه تغشـانـي
يالله مـن الذنـب والغفلـه تنجينـي
ما هو بدايم يصير السانـي حصانـي
كم زلة من لسانـي صـدق تشقينـي
من صغر سني وانا هالحزن يبرانـي
واليـوم عمـري تعدنـه ثلاثيـنـي
صحيح ماني بمثل ابـوي واخوانـي
رغم ان هقوات نفسي نوب تغوينـي
مـا مـد كفـي لكفـا مـا تمنـانـي
ولاسج رجلـي بدربـا مـا يودينـي
ما كذب لاكن اتجمل بعض الاحيانـي
يوم ان ها الكذب صاير شي روتينـي
في ظروف ازرف عزيزا ما تناساني
وفي ظروف ادور مزرفني وناسينـي
اعرف نبض الجفا في وجيه عدوانـي
واعرف نبض الغلا في اللي مواليني
والطعنه اللي تجي من صوب صدقاني
اقسى من الطعنه اللي مـن عدوينـي
كم مرت مات دمعي داخـل اجفانـي
وكم مـرت اتفـه الاسبـاب تبكينـي
كذاب لو قلت شعري يوم ما شقانـي
احيان يسرق منامي من جفـن عينـي
اكتب قصيدي عشان عيـون خلانـي
ومرات اجامل عشان ارضى محبيني
هذا اعترافـي وانـا مانـي بندمانـي
ممكـن ابصـم او التوقيـع يكفينـي